Ar benwythnos olaf ond un Y Ffordd i’r Principality cafwyd gwledd o rygbi mewn 7 rownd derfynol dros y penwythnos.

O fewn cyfnod o lai na thair wythnos mae 34 o rowndiau terfynol wedi eu cynnal yn Stadiwm Principality sydd wedi cynnig cyfleoedd a chreu atgofion oes i gannoedd o chwaraewyr a miloedd lawer o gefnogwyr.

Dydd Sul Ebrill 7fed

Llanymddyfri enillodd Gwpan yr Uwch Gynghrair o 20-18 mewn gêm glos iawn yn erbyn Merthyr.

Sgoriodd y ddau dîm ddau gais yr un – y bachwr Taylor Davies yn croesi ddwywaith i’r Porthmyn a Cole Swannack a Lloyd Rowlands yn sgorio ceisiau o ddyfnder i fechgyn y Wern. Yn y pendraw 10 pwynt o droed y maswr Ioan Hughes oedd y gwahaniaeth rhwng y timau wrth i Lanymddyfri ennill y Cwpan am y trydydd tro yn eu hanes ac am y tro cyntaf ers 2017.

Yn dilyn y chwiban olaf dywedodd Seren y Gêm, Stuart Worrall: “‘Rwyf wedi bod gyda’r clwb am wyth tymor erbyn hyn ac ‘rwy’n gwybod bod ennill y Cwpan yn golygu llawer iawn i’r gymuned. Gydag ychydig o lwc – fe all y tîm ennill y dwbl i’r gymuned mewn ychydig o wythnosau.”

Y Bargôd enillodd Gwpan y Bencampwriaeth

Enillodd Y Bargôd Gwpan y Bencampwriaeth wrth drechu Ystrad Rhondda’n gyfforddus o 65-12.

Yr asgellwr 33 oed Ashley Norton oedd seren yr ornest wrth iddo sgorio 4 cais cofiadwy.

Dywedodd Norton: “Rwyf wrth fy modd. Dyma ddiwrnod gorau fy ngyrfa. Pwy fyddai wedi meddwl y basen i’n sgorio 4 cais yn Stadiwm Principality. Byddaf yn trysori atgofion heddiw am byth.”

‘Roedd Y Bargôd ar y blaen o 34-7 wrth droi ac ‘roedd Callum Hones a Jordan Howells wedi ychwanegu ceisiau at ddau cyntaf Norton. Rhys Prosser a Jordan Howells hawliodd ddau gais arall eu tîm gan ychwanegu at ddwy sgôr ail hanner Norton.

Alex Webber diriodd unig gais Ystrad Rhondda – gollodd yn erbyn Pont-y-pŵl yn y Ffeinal y llynedd hefyd. ‘Roedd y gêm wedi hen lithro o afael bechgyn y Rhondda erbyn i’r cefnwr Dylan Williams weld cerdyn coch am dacl beryglus.

Crwydriaid Llanelli’n dathlu.

Cwydriaid Llanelli gododd Gwpan Adran Gyntaf Admiral yn Stadiwm Principality mewn rownd derfynol agos arall yn erbyn Glyn-nedd.

Cic gosb hwyr Nick Gale gipiodd y fuddugoliaeth o 22-19 i’r Crwydriaid – sy’n cael eu hyfforddi gan Gale ei hun a’i dad Sean. Steffan Jenkins groesodd am eu hunig gais tra i Gale gicio 17 o bwyntiau. Josh Morris diriodd unig gais Glyn-nedd ond doedd cyfanswm Dylan Francis o 14 pwynt gyda’i droed ddim yn ddigon yn y pendraw.

Wedi’r chwiban olaf dywedodd Nick Gale: “Rwy’n falch iawn bod gwaith caled y bois wedi cynnig y cyfle hwyr i mi ennill y gêm. Er fy mod wedi cicio’n reit gywir drwy’r prynhawn. ‘ro’n i’n falch iawn gweld y gic olaf yn hedfan drwy’r pyst.”

Llanharan enillodd Gwpan Ail Adran Admiral.

Sadwrn – Ebrill 6ed

Mae’r freuddwyd o gyfalwni’r trebl yn dal yn fyw i Lanharan wrth iddyn nhw ennill Cwpan Ail Adran Admiral o 44-3 yn erbyn Porthcawl – sy’n cael eu hyfforddi gan ddau gyn-chwaraewr rhyngwladol Cymru, Ryan Bevington a Tom Prydie.

O dan arweiniad Scott Jones fe sgoriodd Llanharan chwe chais trwy Jack Brooks, Jack Walker, Joe Davies (x2), Leon Burton a chwip o gais o 80 metr, goronwyd gan Ieuan Evans.

Ennill coron cynghrair Ail Adran Ddwyreiniol y Rhanbarth Ganol a’r Bowlen Arian yw nod Llanharan cyn ddiwedd y tymor.

Ar ddiwedd y gêm, fe dalodd y capten Scott Jones deyrnged i’w hyfforddwr Gareth Nicholas:”Mae’r gwaith a’r gwahaniaeth y mae Gareth wedi ei wneud yn haeddu clod. ‘Dy’n ni heb golli yn y cynghrair eleni ac ‘ry’n ni wedi ennill y Cwpan hefyd.”

Jay Price yn arwain dathliadau Cwins Caerdydd.

Cwins Caerdydd hawliodd Gwpan Trydedd Adran Admiral o drwch blewyn yn erbyn Y Blaenau o 24-21.

Er i fechgyn Gwent sgorio tri chais o’u cymharu â dau y Cwins, bechgyn y Brifddinas aeth â hi o ganlyniad i gicio cywir Jay Price (14 pwynt) ac ychydig o naïfrwydd gan fois Gwent.

Ellis Jones a Tomi Owens groesodd dros y Cwins tra i Michael John (x2) ac Ellis Evans dirio dros Y Blaenau.

Fe gafodd y maswr profiadol Dai Langdon gyfle i ennill y Cwpan i’r tîm o Went gyda chic gosb hwyr. Er mai ei gwneud hi’n gyfartal o ran sgôr fyddai’r gic – byddai’r Blaenau wedi codi’r Cwpan gan eu bod wedi sgorio mwy o geisiau na’r Cwins. Mynd am y lein a’r sgarmes symudol oedd penderfyniad Langdon – ond methiant fu eu hymdrechion i sicrhau’r cais ac felly diwrnod y Cwins oedd hi fod.

Dywedodd Jay Price Capten Cwins Caerdydd:” Doedd neb wedi rhoi llawer o obaith i ni cyn y gêm – ond mae ennill y Cwpan yn gam mawr ymlaen i ni yn natblygiad ein carfan ifanc.”

Diwrnod yn llawn emosiwn i Saraseniaid Casnewydd.

Wedi i Saraseniaid Casnewydd ennill Cwpan Pedwaredd Adran Admiral, cyflwynwyd eu buddugoliaeth i’w cyd-chwaraewr Dale Tucker, fu farw’n gynharach eleni.

Dim ond o 24-23 y llwyddodd y Saraseniaid i guro Tonna mewn gêm o 7 saith cais a gornest welodd y flaenoriaeth yn newid 5 o weithiau hefyd.

Er i fechgyn Gwent groesi am bedwar cais (Liam Foley, Adam Davies, Kirk Lewis a James Raymond) o gymharu â thri chais Tonna (Josh Ebbitt, Josh Hughes a Gavin Richards) fe gafodd y tîm o Gwm Nedd y cyfle i ennill y gêm yn hwyr.

Yn dilyn cais Richards – taro’r postyn wnaeth trosiad Nicky Fisher – a dyna oedd y gwahaniaeth rhng cipio’r Cwpan a’i weld yn teithio i lawr yr M4 i Gasnewydd.

Dywedodd John Laveneder, Capten Saraseniad Casnewydd; “Chwarae teg i Tonna, ‘roedd yn rhaid i ni fynd y filltir ychwanegol dro ar ôl tro er mwyn eu curo.

“Mae ennill y Cwpan yn golygu llawer iawn i ni wedi i ni golli Dale. ‘Roedd fel brawd i ni ers blynyddoedd ac mae’r fuddugoliaeth yma iddo fe.”

Blaendulais gododd Gwpan y Bumed Adran

Cyn fewnwr Cymru Tavis Knoyle oedd Seren y Gêm wrth i Flaendulais guro Dinas Powys o 27-15 i godi Cwpan Pumed Adran Admiral.

Enillodd Knoyle y cyntaf o’i 11 cap yn Stadiwm Principality yn erbyn Ariannin 13 blynedd yn ôl. Curwyd yr Archentwyr bryd hynny o 28-13 gyda Knoyle yn cael ei ddewis fel chwaraewr gorau’r gêm.

Wrth ddychwelyd i Stadiwm Principality, fe ddechreuodd yr ornest yn safle’r mewnwr – cyn gorffen ei waith am y dydd fel wythwr.

Y Capten Kyle Davies, Jordan McKay a chais cosb gyfrannodd 17 o bwyntiau Blaendulais gyda throed Antony Llewellyn yn gyfrifol am weddill pwyntiau ei dîm.

Rhys Jones a Tom Stout groesodd dros Ddinas Powys gyda chic yr un gan Cian Anderson a Ben White yn cwblhau sgorio bechgyn Bro Morgannwg.

Wedi’r chwiban olaf dywedodd Kyle Davies, Capten Blaendulais ar achlysur ei 356fed ymddangosiad dros ei glwb: “Fi wedi aros deunaw mlynedd am heddiw. Mae’r diwrnod wedi bod yn ychydig o ‘blur’. Fi ddim yn cofio mynd ar y bws y bore ‘ma – ond mae’r cefnogwyr wedi bod yn wych drwy’r dydd. Mae chwarae yn y Stadiwm yn brofiad gwych – ac mae ennill y Cwpan hyd yn oed yn well.”

Club Finder

Title Highlight